Slysavarnafélagið Landsbjörg

Undirbúningur Björgunar 2010 í fullum gangi

Fri, 03 Sep 2010 00:00:00 GMT

Þann 22.- 24. október verður ráðstefnan Björgun 2010 haldin á Grand hóteli í Reykjavík. Að venju er fjöldi fróðlegra og áhugaverðra fyrirlestra í boði en þeir verða yfir 60 talsins. Fyrirlesarar eru bæði íslenskir og erlendir og verða fyrirlestrar fluttir á ensku túlkaðir fyrir þá sem það vilja. Einn salur af fjórum verður að þessu sinn lagður undir rústabjörgun, Íslensku alþjóðabjörgunarsveitina og ferð hennar til Haiti fyrr á þessu ári. Nánari upplýsingar um ráðstefnuna og dagkránna utan hinna hefðbundnu fyrirlestra má finna hér.

Boðið í siglingu í rjómablíðu

Fri, 03 Sep 2010 00:00:00 GMT

Heimsóknum stjórnar Slysavarnafélagsins Landsbjargar til eininga á Norður- og Norðausturlandi lauk í gærkvöldi og tókust þær í alla staði vel. Stórninni var skipt í þrjá hópa sem hver tók fyrir ákveðin svæði innan þessara landshluta. Á myndinni eru Margrét Laxdal og Lilja Magnúsdóttir úr stjórn, Ingólfur Haraldsson starfsmaður á skrifstofu SL, Jón Sigurðsson, formaður Björgunarsveitarinnar Vopna á Vopnafirði og Magni, skipstjóri á björgunarskipinu Sveinbirni. Með í för var einnig Smári Sigurðsson varaformaður SL sem tók myndina. Meðlimir Vopna buðu í stutta siglingu að loknum fundarhöldum í rjómablíðu. Þessi hluti stjórnar heimsótti allar einingar á svæðinu frá Aðaldal til Vopnafjarðar.

Vilt þú stjórna Íslensku alþjóðabjörgunarsveitinni?

Thu, 02 Sep 2010 00:00:00 GMT

Auglýst er eftir tveimur stjórnendum í stjórnendahóp Íslensku alþjóðabjörgunarsveitarinnar. Í dag eru fjórir stjórnendur en í skipulagi er gert ráð fyrir að þeir séu sex talsins. Um sjálfboðaliðastarf er að ræða. Hér er að finna upplýsingar um helstu hlutverk og verkefni stjórnenda og þær kröfur sem gerðar eru til umsækjenda. Tekið er við umsóknum til 20. september.

Starfsmaður óskast á skrifstofu SL

Thu, 02 Sep 2010 00:00:00 GMT

Slysavarnafélagið Landsbjörg óskar eftir að ráða metnaðarfullan og drífandi einstakling í fjölbreytt og skemmtilegt starf á björgunar- og slysavarnasviði. Starfshlutfall er 100%.

Starfssvið:
•      Vinna og skipulagning á verkefnum á björgunar- og slysavarnasviði
•      Umsjón með Safetravel.is
•      Erindrekstur
•      Fyrirlestrahald
•      Greinaskrif og upplýsingagjöf
•      Gerð fræðsluefnis

Smellið á fyrirsögn fréttar til að lesa meira

Ferjuðu varahlut í bát

Wed, 01 Sep 2010 00:00:00 GMT

Í gærkvöldi var óskað eftir aðstoð Björgunarsveitarinnar Garðars á Húsavík við að ferja varahlut út í bát sem var við veiðar norðaustur af Grímsey. Lagði Jón Kjartansson af stað úr höfn kl 21.35. Ferðin sóttist vel og var kominn að bátnum um klukkutíma og korteri síðar. Stutt stopp var gert við bátinn þar sem bætt var á eldsneytisbirgðir Jóns Kjartanssonar fyrir heimferðina. Svarta myrkur og þoka var á svæðinu meðan á heimferðini stóð en gott var í sjóinn . GPS tækið og radarinn reyndust vel í þokunni þar sem hvorki sáust kennileiti né aðrir bátar sem voru á ferðinni. Komið var í land um klukkan 01.00.

Stjórn heimsækir Austur- og Norðausturland

Wed, 01 Sep 2010 00:00:00 GMT

Stjórn Slysavarnafélagsins Landsbjargar heimsækir þessa dagana björgunarsveitir og slysavarnadeildir á Austur- og Norðausturlandi. Á þessum fundum geta einingar félagsins komið sínum sjónarmiðum til stjórnar, komið með ábendingar og kynnt starfið og áherslur sveitarinnar/deildarinnar. Þessi fundarlota hófst í gær þegar hluti stjórnar heimsótti Hjálparsveit skáta á Fjöllum í Möðrudal og Sveinunga á Borgarfirði Eystra. Einnig voru Björgunarsveitin Ísólfur og Slysavarnadeildin Rán á Seyðifirði heimsótt. Heimsóknum stjórnar í þessari lotu lýkur fimmtudagskvöldið 2. sept.

Villtust í þoku í Reykjadal

Wed, 01 Sep 2010 00:00:00 GMT

Hjálparsveit skáta Hveragerði leitaði í gærkvöldi tveggja kvenna er villst höfðu í þoku í Reykjadal. Útkall barst sveitinni um kl. 23:00 og fundust stúlkurnar um klukkustund síðar. Símasamband var við þær allan tímann. Björgunarsveitarmenn kveiktu á sírenum og ljósum á bílum sínum á bílastæðinu við Rjúpnabrekku og heyrðu og sáu stúlkurnar það og var þannig hægt að staðsetja þær.

10 meðlimir HSSH tóku þátt í leitinni sem og Morris, leitarhundur HSSH sem var í sínu fyrsta útkalli eftir að hann tók A-próf í víðavangsleit. Einnig voru sex meðlimir Árborgar á leið á staðinn þegar stúlkurnar fundust.

Fótbrotinn við Norðlingafljót

Tue, 31 Aug 2010 00:00:00 GMT

Björgunarsveitin Ok í Borgarfirði var kölluð út á tíunda tímanum í morgun þegar tilkynning barst um fótbrotinn ferðalang í gljúfri við Norðlingafljót. Sveitarmeðlimir brugðust fljótt við að voru búnir að koma hinum slasaða í bíl innan við klukkustund síðar.

Tvö útköll björgunarsveita í nótt

Sat, 28 Aug 2010 00:00:00 GMT

Björgunarsveitir Slysavarnafélagsins Landsbjargar voru kallaðar tvisvar út í nótt. Um kl hálf þrjú var tilkynnt um að tveggja manna væri saknað eftir að þeir höfðu stungið sér í Reykjavíkurhöfn við þriðja mann, sem skilaði sér uppúr. Voru bátaflokkar og kafarar frá sveitum á höfuðborgarsvæðinu kallaðir út en skömmu síðar afturkallaði lögreglan hjálparbeiðnina.

Tveimur tímum síðar var tilkynnt um týndan mann í Svínadal. Björgunarfélag Akraness og Björgunarsveitin Brák hófu eftirgrennslan sem fyrst í stað bar engan árangur. Þá Björgunarhundasveitin kölluð á vettvang sem og meiri mannskapur var boðaður. Rétt fyrir klukkan níu í morgun fannst maðurinn svo heill á húfi en hann hafði lagst til svefns undir berum himni.

Vélstjórar til RNLI í Bretlandi.

Thu, 26 Aug 2010 00:00:00 GMT

Hópur vélstjóra á björgunarskipum félagsins fór nýverið í náms- og kynnisferð til RNLI í Bretlandi. Markmið ferðarinnar var tvíþætt. Annars vegar að æfa viðbrögð við neyðartilfellum um borð og hinsvegar að sækja námskeið sem veitir þeim full réttindi til vélstjórnar á björgunarskipum félagsins. Námskeiðið var haldið í vélakennslusal RNLI en kennari frá Vélskólanum var með í för og var námskeiðið haldið á Íslensku.